តើពាក្យ «អង្គាដី» មានន័យដូចម្ដេច ?

អង្គាដី

👉ថ្នាក់ពាក្យជា នាមសព្ទ
មានន័យថា ឈ្មោះឈើស្រុក មានដើមខ្ពស់ស្រោង សំបកក្រាស់ ស្លឹកតូចៗរង្វើលៗ ចេញពីធាង ផ្កាព័ណ៌សក៏មានក្រហមក៏មាន, ផ្កានិងស្លឹកខ្ចីស្រុសប្រើជាអន្លក់ឬធ្វើជាបន្លែស្លស្រឡក់បាន, ជាឈើឆាប់លូតលាស់ខ្ពស់ងាយ។
ឈ្មោះព្រឹក្សកំពស់ ៨-១០ ម ដុះក្នុងព្រៃល្បោះនៃអាស៊ីក្តៅ គេច្រើនដាំគ្រប់ប្រភេទក្តៅសកលលោក ជាដើមលំអ ឬសម្រាប់ធ្វើជាជន្លង់ដើមម្រេច។ ស្លឹកខ្ចីៗ និងផ្កា អាចបរិភោគជាបន្លែ។ នៅប្រទេសគេច្រើនយកផ្កាទៅចៀនខ្លាញ់។ សំបកប្រើធ្វើជាថ្នាំរម្ងាប់រោគផ្សេងៗ ដូចជារាគមួល និងគ្រុនចាញ់ជាដើម។ ទឹកដមផ្កា គេដាក់បន្តក់ក្នុងរន្ធច្រមុះ ដើម្បីព្យាបាលជំងឺផ្តាសាយធំ និងឈឺក្បាល។ ស្លឹកអាចធ្វើជាចំណីគោ ក្របី។

ដកស្រង់ពីវចនានុក្រមសម្ដេចព្រះសង្ឃរាជ ជួន ណាត