តើពាក្យ «អៀ» មានន័យដូចម្ដេច ?

អៀ

👉ថ្នាក់ពាក្យជា នាមសព្ទ
មានន័យថា ឈ្មោះរោគមួយប្រភេទ កើតនាភ្នែក ធ្វើទុក្ខភ្នែកឲ្យមានកន្ទុយថ្លែននិងពពឹក ឲ្យភ្នែកពព្រៀកជានិច្ច ( បារ. Trachome ត្រាកូម ) ជាជំងឺរ៉ាំរ៉ៃ ទាំងជារោគងាយឆ្លងពីអ្នកម្នាក់ទៅអ្នកដទៃផងទៀត។
ឧទាហរណ៍៖ ភ្នែកកើតអៀ ឬ អៀស៊ីភ្នែក, ភ្នែកអៀស៊ី ។

                      ក្នុងសម័យបច្ចុប្បន្ននេះគេច្រើនហៅ ត្រាកូម កាមវេជ្ជសាស្ត្រសាកល គេមិនសូវហៅ អៀ ទេ( បើចង់យល់ច្បាស់អំពីប្រភពនិងការព្យាបាលជំងឺត្រាកូមនេះ ចូរសួរគ្រូពេទ្យភ្នែកចុះ ឬបើមានការសង្ស័យក្រែងភ្នែករបស់ខ្លួនមានរោគ ត្រាកូម គួរសុំឲ្យគ្រូពេទ្យភ្នែកពិនិត្យមើល ក៏គង់នឹងអាចដឹងបាន ) ។ ព. កា. ឲ្យងាយចាំហើយប្រយ័ត្នកុំឲ្យរោគអៀស៊ីភ្នែកឆ្លង។
ឧទាហរណ៍៖ រោគអៀស៊ីភ្នែក គ្រូពេទបច្ចេក- ទេសហៅថា ជំងឺត្រាកូម ងាយឆ្លងពីគ្នា គួរបុត្រធីតា ប្រយ័ត្នខា្លចឆ្លង ។ ច្រើនតែក្មេងៗ ដែលវារួមលេង ចូលគ្នាម្ដងៗ ក្មេងម្នាក់មានរោគ ត្រាកូមចម្លង ដោយការទាក់ទង គ្នាវានោះឯង ។ វាឆ្លងងាយណាស់ ទោះចាស់និងចាស់ ក៏ឆ្លងស្ដែងៗ លុះតែពេទ្យភ្នែក ទើបអាចថ្លាថ្លែង ប្រាប់ហេតុនេះឯង ឲ្យអស់សង្ស័យ ។

ដកស្រង់ពីវចនានុក្រមសម្ដេចព្រះសង្ឃរាជ ជួន ណាត