រូបវន្តបុគ្គលជានិវាសនជននៃរដ្ឋភាគីទាំងពីរ = Natural Person as Resident of both Contracting States (សទ្ទានុក្រមពន្ធដារ)

សម្រាប់កម្មវត្ថុនៃការអនុវត្តកិច្ចព្រមព្រៀងស្ដីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល ក្នុងករណីរូបវន្តបុគ្គលជានិវាសនជននៃរដ្ឋភាគីមួយ និងជានិវាសនជននៃរដ្ឋភាគីម្ខាងទៀតនៃកិច្ចព្រមព្រៀង៖
ក. រូបវន្តបុគ្គល ត្រូវកំណត់ថា ជានិវាសនជនរបស់រដ្ឋភាគីណាមួយ ដែលមានទីលំនៅអចិន្រ្តៃយ៍។ ប្រសិនបើរូបវន្តបុគ្គលនោះមានទីលំនៅអចិន្ត្រៃយ៍នៅក្នុងរដ្ឋភាគីទាំងពីរ រូបវន្ដបុគ្គលនោះត្រូវចាត់ទុកថាជានិវាសនជនតែក្នុងរដ្ឋភាគីណាមួយ ដែលមានទំនាក់ទំនងផ្ទាល់ខ្លួន និងទំនាក់ទំនងសេដ្ឋកិច្ចជិតស្និទ្ធជាង (មូលដ្ឋានផលប្រយោជន៍សំខាន់)។
ខ. ប្រសិនបើពុំអាចកំណត់បាននូវរដ្ឋភាគី ដែលរូបវន្តបុគ្គលមានមូលដ្ឋានផលប្រយោជន៍សំខាន់ៗ ឬរូបវន្តបុគ្គលគ្មានទីលំនៅអចិន្ត្រៃយ៍ក្នុងរដ្ឋភាគីណាមួយត្រូវបានចាត់ទុកថាជានិវាសនជនតែក្នុងរដ្ឋភាគីដែលបុគ្គលនោះមានកន្លែងស្នាក់នៅជាទម្លាប់។
គ. ប្រសិនបើរូបវន្តបុគ្គលមាន ឬគ្មានកន្លែងស្នាក់នៅជាទម្លាប់នៅក្នុងរដ្ឋភាគីទាំងពីរ រូបវន្តបុគ្គលនោះត្រូវចាត់ទុកថាជានិវាសនជនតែក្នុងរដ្ឋភាគី ដែលរូបវន្តបុគ្គលនោះមានសញ្ជាតិ។
ឃ. ប្រសិនបើរូបវន្តបុគ្គលមានសញ្ជាតិនៅក្នុងរដ្ឋភាគីទាំងពីរ ឬគ្មានសញ្ជាតិក្នុងរដ្ឋភាគីណាមួយ អាជ្ញាធរមានសមត្ថកិច្ចនៃរដ្ឋភាគីនៃកិច្ចព្រមព្រៀងទាំងពីរត្រូវកំណត់ភាពជានិវាសនជនរបស់រូបវន្តបុគ្គលនោះតាមរយៈការព្រមព្រៀងគ្នាទៅវិញទៅមក។